ELEFANE TAUA'IMISA

elefane taua’i misa.

Ao ou nofnofo i le potu faatalitali a la’u fomai i se tasi aso.
Ma faitau ma matamata i ata o se mekasini sa i le laulau o le potu faatalitali.
Sa faate’ia lau pupula i se ata o ni elefane se lua.
O loo faafetaui o la muaulu e foliga mai o lo’o tau’ai-misa.
O lalo ifo o le ata o loo tusia ai se fuaiupu faapea.
“ E pau le vaega lea e mafatia i le misa a elefane.
O vao lanu meamata lea e soli i vae o elefane.”
Ua aoao mai e lenei ata le tulaga ua iai tagata o le lalolagi.
E tau’ai misa ta’ita’i o malo e pei Amerika ma Iraq.
Ae mafatia ai le toatele o tagata a lautele o nei atunuu.
Taua’i misa ta’ita’i o le Malo Fiti.
Ae mafatia ai tagata tulaga maualalalo o le atunuu.
I totonu o aiga- E taua’i misa ma feesesea’i ulugalii.
Ae mafatia ai le fanau.
A taua’i misa pule o fale faigaluega.
E mafatia ai tagata fai galuega.
A fetaua’i taitai o Ekalesia.
E mafatia tagata o le Ekalesia.
Na fesili se alii i se toeina “ Pe tatau ona mulimuli ma usita’i lana faifeau?’
Tali le toeaina: “E lelei le mulimuli i le faifeau pe a o mulimuli le faifeau i lona Matai sili”

O le taitai lelei na te faia mea uma e tusa ma lona valaauina e le Atua.
Ae le o le faaaogaina o le Atua e faatino ai mea o loo manao lava ia e fai.

Faatoese ma tatalo i le Atua ia avea oe ma taitai lelei.
Manatua ‘E lelei mo oe.