Thursday, October 28, 2010

Povi a le Atua

Povi a le Atua:

O se tala na ou faitau ai e faapea sa i ai se aiga e nonofo i le latou faatoaga. O se aiga e toaaga ma fiafia e o i le lotu. E tele naunau laau aina, i le faatoaga a le aiga lenei. Ae ui lava ina tele isi faamanuiaga i le faatoaga a le aiga e pei o moa ma puaa, ae sa i ai povi e lua a le aiga sa silisili ona fai ma mitamitaga a le aiga e gugutu solo ai le toeaina ma lana fanau i o latou tuaoi ma a latou uo masani. Ona o povi e pei o se masaga e tutusa lanu, tutusa le tino mai ma le puputa ma aulelei o povi e le iloa se eseesega.

Ona o’o lea i se tasi aso sa faapotopoto ai le aiga ona sa faatonu atu e le toeina i lana fanau e omai o lo’o fia talanoa ia i latou uma. Sa fai le latou afiafi faa le aiga e pei ona masani ai le aiga ona o se aiga e mafanafana tele le latou mafutaga. Ina ua uma le lotu o le afiafi a le aiga, o le toeaina ma le fanau ma le tina o le aiga, talanoa loa i le mananaia o povi nei o lo’o i ai i le latou faatoaga.

Faapea mai loa le tama, “Ia faalogo mai outou la’u fanau ma si au ava faapelepeleina.
Ua fai la’u filifiliga ma la’u faasoa i povi e lua, nei o lo’o i le tatou faatoaga. Ou te talitonu fo’i e leai lava se isi o tatou e le o mimita i nei povi. Ia tatou faafetai pea i le Atua aua o ana faamanuiaga uma ia mo le tatou aiga. Ae faalogo mai si ou aiga mitamita i povi e faapena fo’i lou nei tagata ae ua fai lau faaiuga e fatatau i le tatou masaga povi. Ua tasi ai lo’u manatu o le a vavae tutusa a tatou povi, ona e tutusa uma povi e pei ose masaga.

O lea ua ou lagona le musumusuga mai i le Atua, o le a tausi le isi povi mo tatou ae o le a tausi le isi povi mo le Atua. O lona uiga e amata atu i le po lenei, o le povi a le Atua po’o a lava tupe e maua mai i le suasusu ma le aano o le povi a le Atua o le a ave uma i le Atua . Ua fiafia le tina ma le fanau i lenei agaga faau’uina sa i le toeaina ma luelue ulu o lana fanau ma faaalia atu manatu e lagolagoina le faasoa lelei a le toeaina.

E faapea e tasi le vaiaso na soso’o ai ae maua atu e le fanau a le toeina, ua pe le isi povi. Logo loa le toeaina, ona o’o lea i le afiafi o le aso lava lea. e pei o le masani a le aiga, ina ua uma ona fai le lotu ona faapea mai lea o le toeina i lona aiga ma tale tale, ioe! Ma pei e tau le lagona lona leo e pei e lavea se fasi ulu i lona faai. Sa faapea ane ma ona mata faasiasia, tata le gutu ma pupula i lalo o le fola o le fale ma uu lona auvae. “Ose tala faanoanoa mo i tatou i lenei aso e faamalie atu i le tatou aiga “UA PE LE POVI NA VAVAE ESE MO LE ATUA”.

Ioe! O le tasi lea o vaega o le olaga o le tagata Kerisiano e faanoanoa tele ai le Atua.
E faigofie na fai mai o le mea mai le Atua pe afai o lena e te olaola lelei ae vaai atu loa o le a leai sau mea ai pe ua le lava le faasoa, ia galo loa le Atua e afua mai ai mea uma.

Ua faamanatu mai e le Salamo 24:1 - “O le lalolagi ma mea uma o tumu ai o a Ieova ia; o le atu laulau ma e o nonofo ai”


Faafofoga mai tatou, e le’i vaeluaina le finagalo o le Atua ao sauni e maliu mo tagata agasala na tumau ana upu ma tautoga e le’i faafiti lava. O le aiga lea e le’i tapeina e le Atua le povi e tasi lea na ola, sa alofa lava le Atua ma tausi le latou povi e le’i ita le Atua ma tape le povi na totoe, e ui ina ua nonofo ma fai mai e ave i le Atua le povi pe. Ou te talitonu, ana faaola e le aiga lea le povi a le Atua se meamanu ua fanau mai ai se lafu povi e silisili atu nai lo povi e lua.

O se lu’i mo i tatou uma, ia tatou faamuamua le Atua e manuia ai fanau ma aiga ma lou tamaoaiga..E le o faatonu mai le Atua e fasioti lou atalii ma lo’u atalii mo Ia.
Ae ua Ia aioi mai ia tatou talia lona Atalii na maliu e fai ma togiola ina ia maua e oe ma au le ola e faavavau.

Avea Iesu ma ou faatuatuaga i aso uma e te ola fiafia ai ma atili ai ona tele povi o lau lafu povi.

Ma manatua - E Lelei Mo Oe!

No comments:

Post a Comment